معلومات القصيدة
- القصيدة: جبل الصبر
- الشاعـــر: الحاج موسى المعمار الكربلائي
- الديــوان: نسمات كربلائية
- التاريــــخ:
جبل الصبر
يحسين ياخويه وربه سنيني يحسين عكبك من يباريني
ترضه أمشي سبيه وأعوف الغاضريه
يحسين عكبك من يباريني
أون وآنحب و أزيد النوح لمصابك
وأنادي ياعـــلي شو طـــوّل غيابـــك
ريت إتشوف حــالي ولوعه أحبابـــك
تعيد أمجادك إبصــــولات أنســــابك
تهل دمعــة رقيه من ثكل الرزيه
توّن سكنه بأسيه على حسرة شبابك
أصرخ يبويه من يناديني جمرة غيابك مولحت عيني
حكم دهري عليه وأعوف الغاضريه
يحسين عكبك من يباريني
يذّكرنّي مصابك والجرح يــدّي
يهّيج ساكني ضـــلع إمك وجـــدّي
بكيت إبلايّ والـــي ولا أخو عندي
وأشاكف عن عليلي والألم يســـدي
غريبه شلون حالي عكب عزي ودلالي
وأكابر عالجرالي هذا وياك عهدي
أنخاك لا تطفي ضوه عيوني إبحركه وداعك لا تخليني
أظل أفرك إبديه وأعوف الغاضريه
يحسين عكبك من يباريني
يخيّ ثكل النوايب هدمّن حيلي
الأويهن و أصابر بالـــدمع لـــــيلي
جم بسمار صابـني وصحت ويـلي
بايات الصبر يتــــسامى ترتـــيلـي
وحيد وحايره بأمري شهر سيفه عليّ دهري
إبهلي وصّاني وبخدري وأجارى بالوفه وصلى
عيناك وأنت اللي توصيني أفديك روحي وأنت تدريني
أنفذ ها الوصيه وأعوف الغاضريه
يحسين عكبك من يباريني
شذكر يامصيبه وياجرح منـــهن
حرك الباب لوسكط الوصي محسن
لو شهكت رضيعك بالضـمه إتمحن
لو نوح الارامل بالحــزن صـــــفن
وحده إتصيح هابيني وحده إتنوح ياعمي
إبلوعتهن ثلك همي خواتي للخيم ردن
لو بيدي أفديك بنظر عيني وأتوّسد إجروحك تخليني
شلون بهالمسيه وأعوف الغاضربه
يحسين عكبك من يباريني
شواسي ياكلب ياوالــده وياعم
وأباري للوصيه وبالـصبر الهــم
روانّي الدهر من الزغـر بالهــم
إبمصاب إخوتي وأحزاني أتوسم
بيهم زاد همي نوح وصبر سهمي
لا أخ بكه يمي علينه الحزن خيم
إم عباس إجت ليّ وتواسيني إبمصاب إخوتي هامت تعزيني
الأمر ما تم إبديه وأعوف الغاضريه
يحسين عكبك من يباريني
همت ابجروحي أدور عن كفيلي وين
مكوطر عالشريعــــه موسّد الجفـــــين
وسفه إنصاب جوده والـــــسهم بالعـــــين
إبضعيف الصوت ناده وين أخويه حسين
كطّع جبدّته الأكبر تحوقل ربّه و أتحسر
لابن الحسن يتفكر ظهره إنكسر هالحين
لاوالي ظل يميّ ويحاميني نوح العليل الزوّد ونيني
صفت ظلمه عليه وأعوف الغاضريه
يحسين عكبك من يباريني
