فاركتيك إبعٰاشر الأحزان خُويه فاركتيك  -  عالرُمح عَينك تباري لأهل بَيتك

تنظر السَكنه ورقيه  -  وعَينك إعالهاشميه

فاركيتك   - إبعٰاشر الأحزان خُويه فاركيتك

١- خويَه بالخوّه إبغربتي أرد أنشَدك

مِن جبتنه الكربَله وثقت عهَدك

توفي لله بالعهد ولدِّين جَدّك

مِن مشيَت إبلا وداع إشجان كصَدك

خَذت روحُي وَياك والنيران بيّه  -  تسَعر وليل الحزن خيّم عليه

آه من ثكَل الرزَيه  -  وعَينك إعالهاشمَيه

فاركتيك إبعـٰـاشر  الأحزان خوُيه فاركيتك

٢- هــٰا يثورَه إبزُود حيدَر والمدد

ها يبُركان الشجاعه الما خُمد

أدري جَرحك مـٰـا عُفه لحظة ورَكد

وأنت رَمز الغاضَريه  حيَرّت كَلمْن نَشد

ها يخوُيه بكت بلسم للجروح  -  ما تفاركني وأحَس ويَروحي روح

ها يشمعتنه  الضوْيّه   -  وعَينك إعالهاشمَيه

فاركيتك  -  إبعـٰاشر الأحَزان خويه فاركيتك

٣- حيَرتني إمصَيبتك يا ابن الزجّيه

مدرَي أرحَل مدرَي أبكَه مُو بَديه

من عُكَب عَينك يباري الفاطميه

وَمنهُ يحَرس هيَبتك هايالتجّيه

ريت أتوّسد إجروَحك وأغفه ليلي  -  تدري إبغيابك ضَهدني وهدم حيلي

سِكنه نادت وين أبويَه  -  وعينك إعالهاشميه

فاركيتك  -  إبعـٰاشر الأحزان خوُيه فاركيتك

٤-  جَنت هيَبه الجدّك وعَينه الضَوّيه

بَيك يتباهل يَروح الفَــٰاطمَيه

بالأمامه مَتوّج وروح الوُصيّه

إبكربَله مثواك جَنّه سرَمديه

ها ينورك وسَمْ  إنجوم الثرّيه  - بيك باها الكون بالغُرّه البهيّه

يا سليل الطالبيه  -  وعَينك إعالهاشمَيه

فاركيتك  - إبعاشر الأحزان خويه فاركيتك

٥- إبعَزْم سبَعينك عِلت أستارها

إبمَوضع الكرار تزهي أقمارها

وبجنان الخَلد تجري أنهارهـٰا

ترتوي مِن كوثرك أنصـٰارها

تدري إبفراكك شمسنه إبلاي نور  -  والبدر غاب وحَزن ما بالصدور 

إنت عنوان القضيّه  -  وعينك إعالهاشميه

فاركيتك  -  إبعاشر الأحزان خويَه فاركيتك

٦- خوُيه يُومك للشداد أحناهـٰا

والنجوم إتكّورت إبسماهـٰا

عُكَب عينك وين حل منواها

مصيبتك فجعَت الراعي الواها

خوُيه جم طفله تنادي وين أبوَيه  -  وأنه أحسَر إبروحَي راحت وي أخويه

ها ينفسُ الزينبية  -  وعَينك إعالهاشميه

فاركيتك  -  إبعاشر الأحزان خوُيه فاركيتك

٧- عمّه لو حاضر تشوف الحالتي

جان راسك شاب والله المحنتي

بكيت محتاره إبعليلي وعَيلتي

أندب الحيدر وأهُيم إبشهكتي

لأم حسن وحسين أواسي إبدمعتي  -  ولبو صٰالح أشَكي همّي وغربتي

يالثارات الزجيه  -  وعينك إعالهاشميه

فاركيتك – إبعاشر الأحزان خوُيه فاركيتك